საზოგადოებრივი
104.5 FM
EN | GE საქართველოს ხმა ევროვიზიაზე

თამარა გაჩეჩილაძე - ევროვიზიის ეროვნული კონკურსის გამარჯვებული

თამარა გაჩეჩილაძე ევროვიზიის ეროვნული კონკურსის გამარჯვებულია, სიმღერით - Keep the Faith. სწორედ ის წარადგენს საქართველოს 2017 წლის ევროვიზიის სიმღერის კონკურსში, კიევში.

სიმღერის Keep the Faith მუსიკის ავტორია ანრი ჯოხაძე, ხოლო ტექსტის თამარა გაჩეჩილაძე.

ეროვნული კონკურსის გამარჯვებული მაყურებელმა და საერთაშორისო ჟიურიმ 25 კონკურსანტს შორის, ხმის მიცემის შედეგად გამოავლინეს. თამარა გაჩეჩილაძემ ჟიურის წევრებისა და მაყურებლისგან ჯამში - 122 ქულა მოიპოვა.

ევროვიზიის ეროვნული კონკურსის ფინალი 20 იანვარს თბილისის საკონცერტო დარბაზში ჩატარდა. შოუს პირდაპირი ტრანსლაცია საზოგადოებრივმა მაუწყებელმა განახორციელა.

ევროვიზიის სიმღერის რიგით 62-ე კონკურსს კიევი მასპინძლობს. გრანდიოზული შოუს ნახევარფინალები 9 და 11, ხოლო ფინალი 13 მაისს ჩატარდება.

თამარა გაჩეჩილაძე

დაიბადა - 1983 წლის 17 მარტს, თბილისში. 
დაამთავრა ზ. ფალიაშვილის სახელობის მუსიკალური ათწლედი; ასევე ვ. სარაჯიშვილის სახელობის სახელმწიფო კონსერვატორიის საგუნდო-სადირიჟორო ფაკულტეტი.
8 წლის ასაკში მონაწილეობა მიიღო "ფერიების კონკურსში", დაჯილდოებულია პრიზით - "ყველაზე მუსიკალური ფერია". 
9 წლის ასაკში გახდა “ბასტი-ბუბუს” სოლისტი, მონაწილეობდა საბავშვო შოუპროგრამებში. 
11 წლის ასაკში გახდა საბავშვო-საერთაშორისო კონკურსის “ბროლის ნაძვის” ლაურეატი, რის შემდეგ გაემგზავრა მოსკოვში, საერთაშორისო კონკურსზე  “ხრუსტალნაია ნოტა” და გახდა ლაურეატი. იმავე წელს მოსკოვის ტელეარხმა РЕН-ТВ-იმ საახალწლო მუსიკალურ გადაცემაში - “წლის აღმოჩენად" აღიარა.
მონაწილეობდა მსოფლიო-საყმაწვილო დელფიადაში, ასევე ფესტივალებსა და კონცერტებში, მათ შორის აღსანიშნავია “თბილისური გაზაფხული”, “შენ გიმღერი ჩემო თბილის ქალაქო” (ლაურეატის  წოდება), “მანა-94”, ”მანა-95” (ყველაზე პატარა მონაწილე), "საჩუქარი". ის ასევე, მონაწილეობდა ქართული კულტურის დღეებში - ქაიროში, ქართული ფოლკლორული სიმღერის კონცერტებში, მათ შორის აღსანიშნავია იაპონიაში, ებრაელი და ქართველი ხალხების 26-საუკუნოვანი მეგობრობისადმი მიძღვნილი კონცერტი, “თბილისობა", როგორც მერიის საკონცერტო ორკესტრის სოლისტი, 26 მაისის - საქართველოს დამოუკიბლობის დღის აღსანიშნავი კონცერტები, ”ტრასეკას” გახსნა, პრეზიდენტ ჯორჯ ბუშის საქართველოში ვიზიტისადმი მიძღვნილი კონცერტში, ამერიკის საელჩოს გახსნა, კონცერტი სამხედრო აკადემიის კურსდამთავრებულებისათვის და სხვ. გამოდიოდა არაერთი ორგანიზაციის პრეზენტაციებზე (GT, MAGTI, BALI, GEOSTAR). 
2001 წელს, უკრაინაში, სიმღერის საერთაშორისო კონკურსზე - “მორე დრუზეი”,  მოიპოვა პირველი ადგილი. 
2002 წელს, ბელარუსში, სიმღერის საერთაშორისო კონკურსზე - “სლავიანსკი  ბაზარი” მოიპოვა პირველი ადგილი. ამავე წელს მიიწვიეს მოსკოვში, კრემლის სასახლეში გამართულ ა. ბასილაიას საიუბილეო-შემოქმედებით საღამოზე. მონაწილეობდა ბიძინა კვერნაძისა და რუსუდან სებისკვერაძის შემოქმედებით  საღამოებში.
2004 წელს გამოვიდა მისი პირველი ალბომი.
2005-2006 წლებში ქართველი მუსიკალური  პროდუსერის ზ. ლაფერაშვილის და კომპოზიტორ ქრისტიან ლორის მიერ მიწვეული იყო გერმანიაში, სადაც მონაწილეობდა ახალი სიმღერების ჩაწერაში და საკონცერტო გამოსვლებში ბერლინში, მიუნხენში, ნოიბურგში, ინგოლშტადტში. 
2007 წელს სრულიად საქართველოს მუსიკალურ ფესტივალში "პატრინოტი 2007“  დაჯილდოვდა, როგორც ერთ-ერთი გამარჯვებული სიმღერის შემსრულებელი. ამავე წელს, საქართველოს პრეზიდენტის განკარგულებით, დაჯილდოვდა ღირსების მედლით.
თამარა გაჩეჩილაძე ჯგუფის "სტეფანე და 3G" სოლისტი იყო. 2009 წელს ჯგუფი  ევროვიზიის შიდაშესარჩევი კონკურსის გამარჯვებული გახდა. ამავე წელს მონაწილეობდა ევროტურში, ასევე ტელეშოუებში - BBC, Sky News; მოხვდა ევროპის  მუსიკალური  ჩარტების ათეულში. 
2011 წელს გამოვიდა MTV Europe-ის კონცერტში, ბათუმში. 
2015 წელს გაიმარჯვა სატელევიზიო კონკურსში "ერთი-ერთში". 
1997 წლიდან არის თბილისის მუნიციპალიტეტის საკონცერტო ორკესტრის სოლისტი.

ევროვიზიის საკონკურსო სიმღერის - Keep the Faith ვიდეორგოლი

თამარა გაჩეჩილაძე ევროვიზიის ეროვნული კონკურსი

საკონკურსო სიმღერა - Keep the Faith (მუსიკის ავტორი - ანრი ჯოხაძე, ტექსტი - თამარა გაჩეჩილაძე)